Wat sou gebeur as geloofskrywers mekaar gereeld ontmoet om saam te skryf, idees te toets en mekaar verantwoordelik te hou?

In hierdie verkennende sessie deel Tiaan Booyens hoe ’n skrywersgemeenskap vir geloofskrywers kan lyk. Sulke gemeenskappe skep ruimte waar skrywers mekaar ondersteun, idees klankbord en momentum bou rondom hul skryfwerk.

Bybel-Media dink oor die moontlikheid van ’n nuwe ruimte of platform, moontlik onder die naam *Roep, waar mense wat voel hulle is geroep om te skryf, mekaar kan help om daardie roeping te ontwikkel. Die sessie verken:

* watter mense deur so ’n skrywersruimte gehelp word

* hoe gereelde incheck, terugvoer en skryfaktiwiteite momentum kan skep

* hoe ’n geloofsgebaseerde skrywersgemeenskap begin vorm aanneem

Teen die einde van die sessie sal jy:

* ’n duideliker prent hê van hoe ’n geloofskrywersgemeenskap kan werk

* verstaan wie in so ’n ruimte floreer

* idees hê hoe skrywers mekaar kan ondersteun en verantwoordelik hou

* ontdek hoe skryf van ’n private passie na ’n gedeelde roeping kan beweeg

Hierdie sessie is vir mense wat voel hulle het iets om te sê, maar nie alleen die pad wil stap nie.

Aktiwiteit: Skrywerskring

Deelnemers vorm klein groepe van 3–4 mense en ervaar kortliks hoe ’n skrywersgemeenskap kan werk.

Elke deelnemer kry twee minute om te antwoord:

* Wat skryf jy tans of wil jy graag skryf?

* Wat is jou grootste struikelblok om te begin of aan te hou?