In hierdie interaktiewe praktiese sessie gee Christian Oberholzer, voorsitter van die Jeugfokus-skryfspan, ’n oorsig van hoe Jeugfokus Kategese+ ontwerp is en hoe dit in die praktyk in ’n gemeente werk. Die program is ’n gestruktureerde sesjaar-pad wat geloofsvorming ondersteun van voorskool tot belydenisaflegging.

Dit is nie net ’n verduideliking van materiaal nie. Deelnemers kyk saam na hoe kategese as ’n groter geloofsvormingsisteem funksioneer — waarin erediens, huisgeloof, mentorskap en leerprosesse mekaar ondersteun.

Ons verken onder andere hoe die program gemeentes help met:

• gestruktureerde geloofsvorming oor verskillende ouderdomsgroepe

• praktiese begeleiding vir fasiliteerders

• integrasie tussen kategese, erediens en huisgeloof

• toeganklike digitale hulpmiddels wat maklik afgelaai en gebruik kan word

Daar word ook gewys hoe die Missio-aanlyn platform gemeentes help om materiaal eenvoudig te gebruik, aan te pas en te deel.

Teen die einde van die sessie sal deelnemers:

• verstaan hoe die Jeugfokus-program oor ses jaar opgebou is

• sien hoe ’n volledige lesvloei werk

• weet hoe om toegang tot die digitale hulpmiddels te kry

• nuwe idees hê vir geloofsvorming in hul eie gemeente

Hierdie sessie is vir predikante, jeugwerkers en kategete wat ’n gestruktureerde en praktiese benadering tot geloofsvorming soek.

In hierdie sessie kyk deelnemers na kategese as ’n geheelstelsel van geloofsvorming.

Deelnemers ontdek hoe doelwitte, fokus en hulpbronne saamwerk in ’n gemeente se kategese-ekosisteem.

Aktiwiteit tydens die sessie:

Deelnemers neem deel aan die Geloofsvormingoorsig-oefening, ’n kort refleksie-oefening waarin hulle na hul eie gemeente se kategesepraktyk kyk deur drie vrae saam te oorweeg:

• Doelwit: Wat wil ons hê moet oor tyd in jongmense se geloof vorm?

• Fokus: Waar gaan ons energie tans in kategese?

• Hulpbronne: Watter mense, programme en hulpmiddels het ons tot ons beskikking?

Deur hierdie oefening kry deelnemers die geleentheid om ’n tree terug te neem en hul kategese as ’n geheelstelsel te sien, eerder as net ’n weeklikse klas.