Ouerskap lyk nie altyd soos wat ons dit beplan of verwag het nie. Vir sommige is die pad reguit en voorspelbaar; vir ander is dit vol draaie, vrae en selfs verlies. Tog bly die hart dieselfde: ’n diep, standhoudende liefde wat dra, vorm en aanhou liefhê. In hierdie sessie word ons genooi om eerlik en sag te kyk na die baie maniere waarop ouerskap gestalte kry en om te ontdek hoe God juis ook in die ongewone, die moeilike en die onverwagte teenwoordig is. Luné Dorfling help ons om prakties te dink oor ouerskap en bediening deur die Pareto-beginsel. Nico Mostert en Barbara-Mari Swarts bring die alledaagse werklikheid van ouerskap nader: die vreugdes, uitdagings en die heilige roeping om lief te hê, dag vir dag. Piet en Sarizé Retief skep ruimte vir ’n dieper gesprek oor infertiliteit en reproduktiewe gesondheid om ons te help om met groter empatie en sensitiwiteit saam te loop met dié wie se pad anders lyk.