Skriflesing: Matteus 5:9 “Gelukkig is die vredemakers, want hulle sal kinders van God genoem word.”

Gebed: Here, laat elke stemlokaal vreedsaam, toeganklik, ordelik, regverdig en veilig wees. Mag U engelemag op U stem ag slaan terwyl ons verklaar dat Suid-Afrika ‘n land van vrede, herstel en versoening is. Gee aan elke kieser onderskeidingsvermoë, wysheid en noukeurigheid wanneer hulle hul stem uitbring.

Geloofsverklaring: Ons verklaar in geloof dat die Here die God van vrede is. Ons bely dat ware vrede – Sy Shalom – van Hom kom en dat ons gemeenskappe onder Sy heerskappy en sorg staan. Mag U vrede heers in elke stemlokaal en stemdistrik. Ons verklaar en bely die waarheid van Christus se oproep: “Gelukkig is die vredemakers, want hulle sal kinders van God genoem word.” Ons vertrou die Here vir vrede, orde, beskerming en wysheid gedurende die stemproses.