** LET WEL: Die kalender is saamgestel deur die kantoor van die Algemene Sinode en dien slegs as ’n basis. Dit kan aangepas word deur sinodes en gemeentes met byvoeging van unieke plaaslike gebeure.

*Die Week van Gebed is ’n gevestigde gebruik in die NG Kerk. Hierdie spesifieke tyd word ook reeds sedert 1908 internasionaal as ‘n ekumeniese gebedstyd vir die eenheid van die kerk ingerig. Jesus se gebed “dat hulle almal een mag wees” (Johannes 17:21) roep die Kerk tot sigbare eenheid. Deur aan te sluit versterk die NG Kerk ekumeniese verhoudinge, toon nederigheid oor verdeeldheid, en getuig van Christelike eenheid in ‘n gefragmenteerde wêreld.

*Gemeentes stap jaarliks die pad saam met Christus na Sy kruis en opstanding. Tradisioneel word dit oor sewe lydensweke gedoen. Dit skep ruimte vir bekering, selfondersoek, dissipelskap, lyding, kruis, versoening en hoop. Met die herwaardering van die ritme van ’n hele kerklike jaar, is die positiewe gebruik ingevoer om Aswoensdag te vier. Die datum word in die kerkjaar só bepaal dat dit altyd tussen die eerste Sondag en tweede Sondag van die sewe lydensweke val en só gevier word.

*Biddag vir trauma en verlies: Pastorale sorg is in die hart van gemeentebediening en Christelike sorg. Ons is baie bewus van die unieke konteks van lyding in Suid-Afrika. Hoë misdaadstatistiek traumatiseer voortdurend individue, families en gemeenskappe. Die trauma van Covid-19 het steeds impak op baie. Die Bybel roep ons om mekaar se laste te dra (Galasiërs 6:2). ‘n Biddag erken gemeenskaplike pyn, skep ruimte vir heling, en demonstreer die kerk se besorgdheid oor mense. Dit bied hoop te midde van trauma en posisioneer die kerk as ‘n helende teenwoordigheid in ons kwesbare samelewing.

*’n Seisoen van skepping van 1 September tot 4 Oktober word reeds wyd in ekumeniese kringe gevier. Hierdie beweging groei internasionaal in die lig van klimaatsverandering en ‘n duidelike oproep tot getuienis en rentmeesterskap teenoor in verhouding tot die skepping.

*Landbou is die ruggraat van Suid-Afrika se ekonomie en voedselsekerheid. Boere, hul werknemers en landelike gemeenskappe staan onder groot druk vanweë verskeie eksterne faktore, insluitend natuurlike realiteite soos droogtes en klimaatsverandering. Hierdie biddag sou ‘n geleentheid wees om te bid vir reën, goeie oeste, vrede en veiligheid op plase, en wysheid vir beleidsmakers wat landbou raak.

*Internasionale Dag vir Ouer Persone word jaarliks op 1 Oktober gevier om die bydraes van seniors te erken en om te fokus op uitdagings soos gesondheidsorg, maatskaplike sekuriteit en die beskerming van ouer mense se regte.