Beste kollegas
Die Moderatuur van die NG Kerk is deeglik bewus van talle vorme van nood in ons land. Ons is op die oomblik baie bekommerd oor die mate van geweld en misdaad en die impak van droogtes op lewe en die omgewing.
Die Goudland Sinode het inisiatief geneem om mense op te roep na ʼn landwye geleentheid vir verootmoediging en voorbidding op Woensdag 8 November. Ons ondersteun hierdie inisiatief heelhartig en doen ʼn beroep op al ons sinodes om gemeentes aan te moedig om op 8 November verootmoedigings- en voorbiddingsgeleenthede te reël en spesifiek te bid vir:
- die onaanvaarbaar hoë mate van geweldsmisdaad, waarvan plaasmoorde deel is.
- landbou-omstandighede en die impak van droogtes en klimaatsverandering op mense, diere en die omgewing.
As jy die biddag-prent wil aflaai om te gebruik, klik hier.
Groete en seën
Gustav Claassen
Algemene Sekretaris
Nederduitse Gereformeerde Kerk
LET WEL: Ons het terugvoer ontvang dat sekere intekenare nie verlede se nuusbrief ontvang het nie. Die nuusbrief het gehandel oor:
- Vordering rondom die hantering van die hofstukke wat ontvang is
- Reaksie op die verslag van die Commission for Cultural, Religious and Language Rights (CRL)
- Wysingswetsontwerp van die Skolewet
As jy dit nie ontvang het nie, vra ons verskoning. KLIK GERUS HIER OM DIE NUUSBRIEF TE LEES
